उदयपुर । ७२ औँ राष्ट्रिय प्रजातन्त्र दिवसको अवसरमा शनिबार उदयपुर करागारबाट ८ जना कैदी बन्दीले आममाफी पाएका छन् । राष्ट्रिय प्रजातन्त्र दिवसको अवसरमा राष्ट्रपति विद्यादेवी भण्डारीले सरकारको सिफारिस बमोजिम ५ सय १३ कैदी बन्दीहरूलाई कैद र सजाय माफी गरेकी हुन् । त्यस मध्येबाट उदयपुर कारागारबाट ८ जनाले आम माफी पाएर जेल मुक्त भएको उदयपुर कारागारका प्रमुख (जेलर) कुमार खड्काले बताए ।
गृहमन्त्रालयले ५० प्रतिशत कैद सजाय भुक्तान गरेका, आचरण सुधार गरेका, नकारात्मक गतिविधिमा संलग्न नभएका, चालचलन सुधार गरेका कैदीबन्दीलाई सजाय मिनाहा गर्न मापदण्ड अनुसार उदयपुरका ८ जना आममाफी पाएका हुन् । गृहमन्त्रालयले पत्राचार गरेको मापदण्ड अनुसार उदयपुरबाट ८ जना कैदीको लागि आममाफीको लागि सिफारिस गरिएको थियो ।
आममाफी पाउनेहरुमा सवारी ज्यान सम्बन्धी मुद्दाका दुई, बहुविवाह मुद्दाका चार र चोरी मुद्दाका दुई जना रहेको कारागार प्रमुख खड्काले जानकारी दिए । उनीहरु शनिबार विहानै कारागार मुक्त भएका छन् ।
सवारी ज्यान मुद्दामा सजाय काटिरहेका लहान नगरपालिका १७ सिरहाका ३४ वर्षिय दुर्गानन्द विश्वकर्मा र त्रियुगा नगरपालिका ४ का ३२ वर्षिय हेम बहादुर विश्वकर्मा रहेका छन् ।
यस्तै बहुविवाह मुद्दामा दोषी करार भई सजाय भोग्दै आएका चौदण्डीगढी नगरपालिका १ का ३२ वर्षिय कृष्ण बहादुर नेपाली, सोही नपा ६ का ४६ हरिमान कटुवाल, त्रियुगा नगरपालिका ३ का नेत्र बहादुर खड्का र बेलका नगरपालका २ का ३२ वर्षिय राजेन्द्र योन्जन रहेका छन् ।
यस्तै चोरी मुद्दामा सजाय भोगिरहेका दमक नगरपालिका ५ झापाका ३७ वर्षिय सरोज भण्डारी र चौदण्डीगढी नगरपालिका ४ का ३६ वर्षिय नइन्द्र बहादुर बुढाथोकी पनि आममाफी पाएका छन् ।
राष्ट्रपति भण्डारीले नेपालको संविधानको धारा–२७६ बमोजिम देशभरका कारागारमा रहेका ५ सय १ जना बन्दीहरूको भुक्तान हुन बाँकी कैद सजाय मिनाहा र मन्त्रिपरिषद्को सिफारिसमा १२ जनाको सजाय माफी दिइएको छ ।
अघिल्ला वर्षहरूमा पनि प्रजातन्त्र दिवसको अवसर पारेर विभिन्न घटनामा दोषी प्रमाणित भई बन्दी जीवन बिताइरहेकाहरूलाई राष्ट्रपतिबाट आममाफी दिने गरिएको थियो ।
