उदयपुर / उदयपुरको कटारी नगरपालिका ४ मरुवा बिजुले घुम्तीमा बोलेरो दुर्घटना हुँदा एक जनाको मृत्यु भएको छ भने आठ जना घाइते भएका छन् । कटारी बजारबाट दिउँसो साढे चार बजे सिरिसेघुम्ती जाँदै गरेको बा.१० च ४१८८ नम्बरको बोलेरो मरुवा बिजुले घुम्तिमा अनियन्त्रित भएर दुर्घटना भएको थियो । 
मृत्यु हुनेमा कटारी नगरपालिका ८ पाटाखोला बस्ने ३८ वर्षिय विक्रम राना मगर रहेका छन् । उनको उपचारको क्रममा कटारी अस्पतालमा मृत्यु भएको भएको जिल्ला ट्राफिक प्रहरी कार्यालयका प्रमुख लिला बहादुर श्रेष्ठले जानकारी दिए ।
यस्तै घाइते हुनेमा सोही ठाउँका ५६ वर्षिय सेतीमाया श्रेष्ठ, ५२ वर्षिय चन्द्र श्रेष्ठ, उमेर नखुलेको गीता श्रेष्ठ, १७ वर्षिय मनोज खड्का, ५२ वर्षिय किशनलाल श्रेष्ठ, ५ वर्षिय बालक दिवस श्रेष्ठ, ३६ वर्षिय बुद्धिमाया श्रेष्ठ र ३५ वर्षिय बेदकुमारी श्रेष्ठ रहेको ट्राफिक प्रहरी प्रमुख श्रेष्ठले जानकारी दिए । तिब्र गतिमा बोलेर कुदाएकोले अनियन्त्रित भएर दुर्घटना भएको उनले बताए । उनीहरुको कटारी अस्पतालमा उपचार भईरहेको छ भने बोलेरो चालक प्रेम बहादुर श्रेष्ठ फरार भएका छन् ।
