उदयपुर । उदयपुरको ताप्ली गाउँपालिका ५ रुपाटारमा अज्ञात समूहले पालिका केन्द्रको गेटमा राखेको बम सेनाले डिस्पोज गराएको छ । अज्ञात समूहले आइताबार विहान १ः३० बजे एउटा बम पालिका भवनमा विस्फोट गराएका थिए भने अर्को कार्यालयको गेटमा विस्फोट नभई त्यसै बसेको बमलाई नेपाली सेनाले डिस्पोजल गराएको छ ।
उदयपुरमा रहेको नेपाली सेनाको रण शार्दुल गण बोक्सेको बम डिस्पोजल टोलीले आइतबार साँझ करिव ६ः३० बजे डिस्पोज गराएको जिल्ला प्रहरी कार्यालय उदयपुरका प्रमुख (एसपी) भिमबहादुर दाहालले जानकारी दिए ।
आइतबार अज्ञात समूहले राखेको बम शक्तिशाली नभई सुतली रहेको सेनाले जनाएको छ । गाउँपालिका कार्यालयलाई लक्षित गरी राखिएको बम एउटा विस्फोट भएका थिए भने कार्यालय गेटमा रहेको बम विस्फोट हुन बाँकी रहेको थियो ।
बम कसले राखेको भन्ने विषयमा प्रहरीले अनुसन्धान समेत थालेको जनाइएको छ । बम विस्फोटको कसैले जिम्मा नलिएकोले अज्ञात नै रहेको एसपी दाहालले जानकारी दिए ।
अज्ञात समुहले विस्फोट गराएको बलले नागरिक सहायता कक्षमा क्षति पुग्नुको साथै प्रमुख प्रशासकिय अधिकृत, लेखा अधिकृत, उपाध्यक्षको कार्यकक्षमा क्षति पुगेको गाउँपालिकाका अध्यक्ष उद्धव सिंह थापाले जानकारी दिए । बम विस्फोटले ती कार्यकक्षको ढोका, झ्याल, कम्प्युटर, प्रिन्टर, टेबल, दराज, सोफा लगायतका सामानमा क्षति भएको थियो ।
बम विस्फोटन कसले र किन गराएको भन्ने आफू अनभिज्ञ रहेको गाउँपालिका प्रमुख थापाले बताए । अहिलेसम्म कुनै समूह, व्यक्ति, संस्थाबाट कसैले कुनै किसिमको चन्दा, धाम्की केही नदिएको थापाले बताए ।
गाउँपालिकाको आफ्नै कार्यालय नहुँदा पालिका केन्द्र महेन्द्र रत्न माध्यमिक विद्यालयको भवनमा भाडामा संचालनमा रहेको छ ।
सम्बन्धित समाचार
उदयपुरको ताप्ली गाउँपालिका कार्यालय भवनमा बम विस्फोट
