सुखिलाल चौधरी, उदयपुर । सुनसरी कोशी गाउँपालिका ७ हरिपुर चोकमा गत मंसिर १५ शनिबार राति १२ः२० बजेको समयमा ट्रक र एम्बुलेन्स एक आपसमा ठक्कर खाँदा उदयपुर त्रियुगा नगरपालिका १० का एकै परिवारका ६ जना र चालक सहित ६ जनाको घटना स्थलमै मृत्यु भएको थियो ।
विराटनगरको सुरक्षा अस्पतालबाट ८५ वर्षिय शिवमाया राईलाई उपचार गराएर उदयपुरको गाईघाट तर्फ आउँदै गरेको को १ च ९३६४ नम्बरको एम्बुलेन्सलाई विपरित दिशाबाट गईरहेको ना २ ख ९०८२ नम्बरको ट्रकले ठक्कर दिँदा एम्बुलेन्सका चालक सहित ६ जनाको घटनास्थलमै मृत्यु भएको थियो । 
मृत्यु हुनेहरुमा त्रियुगा नगरपालिका १० बस्ने ८५ वर्षिय शिवमाया राई, छोरा ५० वर्षिय तुलबहादुर, भतिज ३२ वर्षिय दिनेश, ज्वाई ६१ वर्षिय उद्धव र नातिहरु ३१ वर्षिय दुर्गाधन र २८ वर्षिय टेकेन्द्र राईको घटना स्थलमै मृत्यु भएको थियो । यस्तै त्रियुगा नगरपालिका ८ का एम्बुलेन्स चालक राजेश दनुवारको पनि सोही दुर्घटनामा मृत्यु भएको थियो ।
दुर्घटनामा परेका परिवारको अवस्था अहिले दयनिय छ । अटो रिक्सा चलाएर परिवार पाल्दै आएका मृतक दिनेशको मृत्यु भएपछि छोरा छोरीको लालन पालन २९ वर्षिय श्रीमति विना राईको काधमा आई लागिन । छोरा इमाहाङ १ वर्षका हुँदा बुवा वित्यो, ठूली छोरी पुजा ११ वर्ष, कान्छी छोरी एन्जल ४ वर्षकी छिन् ।
सम्पतिको नाममा घर अडिने जग्गा मात्रै रहेकी श्रीमानको मृत्यु पछि विनालाई परिवार चलाउन एकदमै मुस्किल परिरहेकी छिन् । ‘छोरा छोरीलाई पढाउन लेखाउन समस्या छदै छ, ट्रक व्यवसायीबाट पाउनु पर्ने क्षतिपूर्ति पाएको छुइन् । कसरी पेट पाल्नु ।’ भावुक हुँदै विनाले भनिन्, ‘आज खायो भोली कहाँबाट लिएर खाउँ भन्दै दिनहरु वित्ने गरेको छ, जग्गा जमिनको नाममा घरले ओगटेको बाहेक अरु केही छैनन् । जेनतेन परिवार पाल्नका लागि श्रीमानले अटो किस्तामा खरिद गरेका थिए । श्रीमानको देहान्त पछि भएको अटो पनि फाइन्सले तानेर लग्यो ।’ गुजारा चलाउने कुनै उपाय नै छैन् । त्यो दिनको घटनालाई सम्झिदै अहिले पनि भाव विहिल भईरहेकी छिन् ।
आफुहरुले पाउनु पर्ने रकम ट्रक व्यवसायीले नदिइएले पनि आफुहरुको अवस्था दयनिय बन्दै गएको उनले बताईन् । रकम असुल गरिदिने बारे सुनसरी जिल्ला प्रहरी कार्यालय पनि मौन रहेको बताईन् । विनाले भनिन, ‘ट्रक व्यवसायीबाट क्षतिपूर्ति दिलाई दिन जिल्ला प्रहरी कार्यालय सुनसरी पाँच पटक गईयो तर, प्रहरी प्रशासनले हाम्रो कुरै सुनुवाई नगरेको गुनासो गरिन्’
सोही घटनामा अर्का २४ वर्षिय लिला राई र टेकेन्द्र विच विवाह भएको ६ महिना नवित्दै टेकेन्द्र दुर्घटनामा ज्यान गुमाए । मृतककी श्रीमति लिलाले भनिन्, ‘छोरी गर्भमा बस्नु र छोरीको बावाको दुर्घटनामा देहान्त हुनु संयोग भनौ या वियोग ।’ छोरी निरुहाङ्ग अहिले ३ महिना पुगिन् । श्रीमानको छोरा छोरीलाई भविष्यमा डाक्टर नर्स बनाउने सपना पनि तुहिएर गयो ।
हजुरआमाको अवस्था सुधार भयो, हामी हजुरआमालाई विराटनगरबाट आउँदैछु भनेको मोवाईलको आवाज अहिले पनि कानमा गुन्जि रहेको छ तर, उहाँ कहिल्यै नफर्किने गरी हामीलाई छोडेर जानु भयो, आउनै भएन । सुख के हो, खुशी के हो सवै हराएको छ हाम्रो परिवारमा । लिलाले आँखा भरी आँशु पार्दै भनिन, ‘मेरो छोरी कत्ती अभागी रहिछ आफ्नो बाबालाई बाबा भनेर बोलाऊँन पनि पाइन, छोरीलाई बाबाको माया कस्तो हुन्छ सम्मको अनुभूति पाइन । बाबाले पनि छोरीलाई अंगालो हालेर छोरी सम्म भन्न पाउनु भएन । छोरीले बावाको माया पनि पाइन । मैले श्रीमानको साथ पाइन । श्रीमान श्रीमति विचको माया कस्तो हुन्छ भन्ने ६ महिना नपुग्दै दैवले टुटाइ दियो ।
लिला मात्र होइन उनकै जेठानी दुर्गाधनकी श्रीमति २४ वर्षिय सृजना पनि बैवाहिक बन्धनमा बाँधिएको ४ वर्ष नपुग्दै वियोगान्तमा परिणत भयो । अहिले उनका छोरी ४ वर्ष पुगिन । उनले पनि श्रीमानको माया वर्षौसम्म पाउन सकिनन । उनीहरुको परिवारको पुर्खौली पेशा कृषी हुन् । सासुरा हजुरबुवा अर्थमान राई हिडडुल गर्न नसक्ने छन भने काका सासु ससुरा आपाङ्ग छन् । आफ्ना श्रीमान, देवर, सासुरा, हजुरआमा सासु दुर्घटनामा गुमाइन । घरमा काम गर्ने पुरुष कोही छैन् । घरमुलीकै मृत्यु भएपछि अहिले परिवार छिन्नभिन्न अवस्थामा पुगेका छन् । ‘कहाँ कसरी व्यवहार गर्ने भन्नेमा हामी आलाकाँचा बुहारीहरुलाई केही थाह छैन्’ सृजनाले भनिन् ।
यस्तै श्रीमति, एक छोरा, दुई नाति, ज्वाई र भतिज गुमाएको पीडाले ८६ वर्षिय अर्थमान राई राति बरबराउने, निन्द्रामै रुने हास्ने, कहिले काही मध्य राति नै उठेर गाउँ तिर बेहोसीमा जाने गरेको नातिनी बुहारी सृजनाले बताई ।
अर्का मृतक उद्धब राईको श्रीमती आशा राई त्यो बेलाको घटना सम्झदा पनि आफु पागल जस्तो हुने गरेको बताउछिन । गरीब भए पछि न्याय पाउन पनि गाह्रो हुदो रहेछ उनले भनिन ।’ कसैको जीवनमा पनि यस्तो घटना नहोस् ।
मेरो सबै परिवार वित्यो यो उमेरमा आफ्ना सबैलाई गुमाए पछिको पीडा कस्तो होला अर्थमानले बोल्न नसकी नसकी हामीलाई भने ।
अर्थमानका आफन्त नवीन राईले दोषीलाई कारबाही गराउन र क्षेतिपूर्ति दिलाऊन सुनसरी जिल्ला प्रहरी कहाँ दशौ पटक गए तर प्रहरीले कुनै चासो नदेखाएको उनको गुनासो छ । अदालतबाट एम्बुलेन्स मालिक र ट्रक मालिकलाई प्रकाउ गर्न अदालतले पुर्जी जारी भए पनि प्रहरीले घटना घटेको १० महिना सम्म पक्राउ गर्न सकेको छैन । न त पीडितले क्षतिपूर्ति नै पाएका छन । यस्तो गम्भीर बिषयमा प्रहरीले चासो नदिदा पीडितहरु झन पीडामा परेका छन ।
घटनाका विषयमा जिल्ला प्रहरी कार्यालय सुनसरीका प्रमुख कमल थापाले ट्रक धनी विरगंज महानगरपालिका १३ का ५० वर्षिय मैया खत्रीलाई पटक पटक खोज तलास गर्दा पनि फेला नपरेको जानकारी दिए । उनका अनुसार ट्रक चालक पनि सोही महानगरपालिका ८ बस्ने ४५ वर्षिय हिरा राउत कुर्मी फरार रहेकोले क्षतिपूर्ति दिलाउन नसकेको स्वीकार गरेका छन् ।
