उदयपुर / उदयपुरमा बुधबार आगलागीबाट तीन घर जलेर नष्ट भएको छ । जिल्लाको कटारी नगरपालिका ८ घुम्ती शिरिसेमा आगलागीबाट तीन घर जलेका छन् ।
आगलागीबाट ८ लाख बराबरको क्षति भएको जिल्ला प्रहरी कार्यालय उदयपुरका सूचना अधिकारी डिएसपी अर्जुन रानाभाटले जानकारी दिए । उनका अनुसार स्थानीय कृष्णलाल श्रेष्ठ, दिलबहादुर श्रेष्ठ र मकर बहादुर श्रेष्ठको घर जलेर नष्ट भएको हो ।
कृष्णलाल श्रेष्ठको फुसको छाना भएको एकतले घर, नगद १५ हजार, किराना सामान, अन्नपात, लत्ताकपडा, भाँडावर्तन सहित अन्दाजी ४ लाख मूल्य बराबरको क्षति भएको छ । यसैगरी दिलबहादुर श्रेष्ठको फुसको छाना भएको एकतले घर र काठपातसहित अन्दाजी एक लाख मूल्य बराबरको क्षति भएको प्रहरीको भनाइ छ । यसैगरी मकर बहादुर श्रेष्ठको फुसको छाना भएको १ तले घर, नगद ३ हजार, लत्ताकपडा, भाँडावर्तन र अन्नपातसहित अन्दाजी ३ लाख मूल्य बराबरको क्षति भएको छ । आगो कसरी लाग्यो भने अहिलेसम्म खुल्न सकेको छैन् ।
