उदयपुर । उदयपुरको त्रियुगा नगरपालिका ३ भुल्केस्थित मस्जिदमा १३ जना कोरोना संक्रमित फेला परेपछि सो क्षेत्रका स्थानीय र नेपाली सेना गरी आइतबार एक सय ५२ जनाको थ्रोट स्वाब नमूना संकलन गरेर परीक्षणको लागि आइतबार राति एम्बुलेन्समार्फत शुक्रराज ट्रपिकल तथा सरुवा रोग अस्पताल टेकु पठाईएको छ । त्रियुगा नगरपालिकाको पहलमा शुक्रराज ट्रपिकल तथा सरुवा रोग अस्पताल टेकुको सहयोग र नेपाली सेना छाउनी अस्पतालको प्राविधिक सहयोगमा आइतबार १८ जना सैनिक अधिकारी सहित १ सय ५२ जनाको संकलित स्वाब टेकु पठाईएको हो । आईतबार १०८ महिला र ४४ पुरुष गरी एक सय ५२ जनाको स्वाब संकलन गरेको हो । 
२ सय ५० वटा स्वाब संकलन गर्ने किटसहित नेपाली सेनाको छाउनी अस्पतालका मेजर डा. प्राची रायमाझीको नेतृत्वमा आएको ४ जनाको स्वास्थ्यकर्मीको टोलीले समय अभावका कारण सबैको नमुना संकलन गर्न नभ्याएपछि पुनः सोमबार संकलन गर्ने भएको हो । यस अघि संक्रमितसँग हिमचिम रहेका ६९ जनाको आइतबार सामाजिक विकास मन्त्रालय प्रदेश नं. १ बाट आएको टोलीले संकलन गरेर कोशी अस्पतालको ल्याबमा पठाएको छ ।
नेपाली सेनाको हेलिकप्टरमार्फत आईतबार दिउँसो भुल्के आईपुगेको टोलीले श्री नम्बर १८ नम्बर वाहिनीको फिल्डमा नमुना संकलन गरेको बाहिनीपति सहायक रथी कृष्णप्रसाद सापकोटाले जानकारी दिए ।
पहिलो चरणमा मुस्लिम टोलका व्यक्तिहरुको स्वाब संकलन गरी सोही टोल वरिपरीका घरका मानिसहरुको दोस्रो चरणमा र भुल्के गाउँका प्रत्येक घरबाट एकजनाको तेस्रो चरणमा स्वाबको नमूना संकलन गरिने जिल्ला स्वास्थ्य कार्यालयका प्रमुख मोहनप्रसाद सुवेदीले जानकारी दिए ।
यस्तै त्रियुगा नगरपालिकाका मेयर बलदेव चौधरीले संघिय मामिला तथा सामान्य प्रशासन मन्त्री र स्वास्थ्य तथा जनसंख्या मन्त्रीलाई २५ हजार मानिसको थ्रोट स्वाब परीक्षण गर्नको लागि पत्रचार गरेको थियो । त्रियुगा नगरपालिका वडा नं. १, २, १२ र ६ मा लकडाउन अघि जमातीहरु धर्म प्रचार प्रसार गर्नको लागि गएकोले सो आसपासका अन्य वस्तीमा समेत करिव २५ हजार मानिसको स्वाब परीक्षणको लागि एक विशेष क्याम्प खडा गर्न र अन्य आवश्यक सहयोग गर्न अनुरोध गरेको मेयर बलदेव चौधरीले जानकारी दिए ।
