उदयपुर – उदयपुरको सदरमुकाम भन्दा एक किलो मिटर दक्षिण मोतिगडामा कार्यालय रहेको एक लघुवित वित्तिय संस्थामा लागेको ताला प्रहरीले फुटाएको छ । आईतबार नेपाल कम्युनिष्ट पार्टी (बहुमत) समूहले त्रियुगा नगरपालिका ३ मोतिगडामा रहेको नयाँ शारथी लघुवित वित्तिय संस्थामा ताला लगाएको थियो ।
नेकपा (बहुमत) पूर्वी व्युरोका १२–१५ जनाको समूहमा आएको कार्यकर्ताहरुले लघुवित वित्तिय संस्थाका एक जना कर्मचारीलाई बाहिर निकालेर दुई वटा कोठामा ताला लगाउनुको साथै ब्यानर समेत झुण्डाएको थियो ।
अहिले लघुवित्त संस्थाहरुले देशव्यापी रुपमा गरिब जनताहरुलाई उठिबास लगाएको भन्दै नेपाल कम्युनिष्ट पार्टी (बहुमत) समुहले ताला लगाएको थियो । लघुवित्तिय संस्थाहरु प्रति अहिले देशव्यापी रुपमा विरोध र प्रदर्शन हुँदै आएको छ । लघुवित्तिय संस्थाहरु खारेज गर, जनताको लागानी फिर्ता गर, पिडितहरुको ऋण मिनाहा गर भन्ने कालो व्यानर सहित कार्यालयमा ताला लगाईएको थियो । दिउँसो २ बजेको समयमा प्रहरीले सो लघुवित्त संस्थाको ताला फोडनुको साथै ब्यानर समेत झिकेका थिए ।
उक्त लघुवित्त वित्तिय संस्थाको कार्यालयको क्षेत्राधिकार उदयपुर र सप्तरी रहेको छ ।
