उदयपुर । उदयपुरको सदरमुकाम गाईघाटमा लक्ष्मी पुजाको दिन राति १२ः३० बजेको समयमा विद्युत सर्ट भई आगलागी हुँदा डेढ करोड बढीको क्षति भएको छ । त्रियुगा नगरपालिका ११ स्थित डिएम गेटमा रहेको ॐ रौतारानी हाउस एण्ड सप्लार्यद्वारा संचालित मोटर साइकलको रिकण्डिशन हाउसमा विद्युत सर्ट भई आगलागी भएको छ । 
विद्युत सर्ट भई आगालगी हुँदा रिकण्डिसन हाउसमा विक्रीका लागि रहेका ४५ वटा बढी मोटर साइकल पूर्ण रुपमा जलेर नष्ट भएको प्रहरीले जनाएको छ । आगलागीबाट अफिसका सामग्री, ल्यापटप तीन थान, प्रिन्टर, ग्यारेजका सामानहरु, मोटर पार्टहरु पूर्ण रुपमा क्षति भएको प्रहरीले जनाएको छ ।
रिकण्डिशन हाउसमा राति ८ बजे लक्ष्मी पुजा आर्धना गरी घर गएपछि राति १२ः३० बजे आगलागी भएको जानकारी आएको संचालक राजकुमार राउतले जानकारी दिए ।
अर्का संचालक टेक बहादुर दाहालका अनुसार रिकण्डिशन हाउसमा कोही नबस्ने भएकोले यति धेरै क्षति भएको जानकारी गराए । आगलागी भित्र कोठाबाट शुरु भएपछि मात्रै बाहिर आएकोले छिमेकीहरुले थाह पाएको संचालक दाहालले बताए ।
यता विद्युत सर्टबाट घरको विम, क्षत, वालमा क्षति पुगेको घरधनी किस्मत अलीले जानकारी दिए । उनका अनुसार भुई तल्लामा मोटर साइकलको रिकण्डिशन हाउस भएपनि पहिलो र दोस्रो तल्ला निर्माणको क्रममा रहेकोले कोहि पनि नबस्ने भएपछि आगलागी बारे ढिलो थाह भएको घरधनी अलीले जानकारी दिए ।
