उदयपुर । जिल्लाको चौदण्डीगढी नगरपालिकाको आइतबार सम्पन्न चौंथो नगर सभालाई चार जना वडाध्यक्ष सहित सदस्यहरुले नगर सभा बहिस्कार गरेका छन् । 
आर्थिक वर्ष २०७७÷७८ का नीति तथा वार्षिक कार्याक्रमका लागि वडा परिषदबाट पास भई नगरमा जाने र नगरसभाले त्यसलाई अनुमोदन गर्ने प्राबधान विपरित नगर सभाले पास नगरेको भन्दै चार वडाध्यक्ष सहित सदस्यहरुले असहमति जनाउँदै नगर सभा बहिष्कार गरेका हुन् ।
बहिष्कार गर्नेमा चौदण्डीगढी नगरपालिका वडा नं. २ का वडाअध्यक्ष सन्तोष सुबेदी ‘बलिदान’, वडा नं. ५ का वडाअध्यक्ष देब नारायण चौधरी, वडा नं. ६ का वडाअध्यक्ष कमलध्वज राई र वडा नं. ९ का वडाअध्यक्ष प्रकाश राउत रहेका छन् । उनीहरुले एक संयुक्त प्रेस बिज्ञप्ती जारी गर्दै नगरसभा बहिष्कार गरिएको जानकारी गराएका थिए ।
चौदण्डीगढी नगरपालिकामा प्रतिवडा १ करोड विनियोजन गरेको मेयर खगेन्द्र राईले बताए । उनका अनुसार वडागत ५० लाखका दरले र नगरबाट प्रतिवडा थप ५० लाख गरी १ करोड बजेट विनियोजन गरेको बताए । मेयरका अनुसार स्थानीय शासन ऐन विपरित पूर्वाधार भन्दा बढी सामाजिक विकासमा बढी बजेट विनियोजन गरेको देखिएकोले संशोधन गरेर पूर्वाधार तर्फ बजेट विनियोजन गरेको र सो बजेट वडा परिषदले पास गरेको पूर्वाधारतर्फको योजनामा थप गरि दिएको बताए । वडा परिषदले सिफारिस गरेको कुनै पनि योजना कटौती नगरेको मेयर राईले बताए ।
यस्तै वडागत गौरवका १० लाख भन्दा माथिको ५ वटा योजनाहरु छनौट गर्न निर्देशन दिईएपनि केही वडाहरुले प्रायः ५–६ लाखको आयोजनाहरु छनौट गरेर पठाएकोमा केही योजनाहरु संशोधन गरेर १० लाख माथिको पास गरेको मेयर राईले बताए।
संयुक्त प्रेस विज्ञप्ती
