उदयपुर । उदयपुरमा अवैध ढुंगा, गिट्टी, बालुवा निकाल्ने ट्याक्टरहरु धमाधम पक्राउ पर्न थालेका छन् । बुधबार विहान ७ बजे त्रियुगा नगरपालिका ३ स्थित त्रियुगा खोलामा बालुवा निकाल्दै गर्दा स.१ त ३१३७ नम्बरको ट्याक्टर पक्राउ परेको हो ।
‘राष्ट्रपति चुरे तराई मधेस कार्यक्रम’ लागू भएको जिल्ला उदयपुरमा असार १ गतेदेखि नदीजन्य पदार्थ उत्खनन तथा ओसारपसार र विक्री वितरण गर्न कानुनी रुपमा मनाही गरिए पनि लुकीचोरी उत्खनन र चोरी निकासी रोकिएको छैन । यसरी अवैध नदीजन्य पदार्थ उत्खनन गरेर विक्री वितरण गरेको अभियोगमा यहाँको प्रहरीले दुई वटा ट्याक्टर नियन्त्रणमा लिएर कारबाहीका लागि जिल्ला समन्वय समितिको जिम्मा लगाएको छ ।
अघिल्लो दिन मात्र एउटा ट्याक्टरलाई बालुवा निकाल्दै गरेका बेला फेला पारेर पक्राउ गरी जिल्ला समन्वय समितिबाट जरिवाना गराएर छाडेको प्रहरीले बुधबार पुनः अर्को ट्याक्टरलाई त्यसैगरी बालुवा चोरी अभियोगमा रंगेहात फेला पारेर पक्राउ गरेको हो । मंगलबार विहान झिसमिसेमै त्रियुगा खोलामै बालुवा झिक्दै गरेको भेटेर गस्ती टोलीले स १ त ५८६९ नं. को ट्याक्टर नियन्त्रणमा लिएको थियो । जिल्ला प्रहरी प्रमुख एसपी वीरबहादुर बुढामगरले असार लागेदेखि नै उदयपुरका कुनै पनि खोला खहरेबाट ढुंगा गिटी बालुवा निकाल्न र विक्री वितरण गर्न नपाउने मन्त्रालयको कडा निर्देशन रहेको बताए । तर, स्थानीय खोला खहरेबाट लुकी चोरी बालुवा गिटी निकाल्ने क्रम नरोकिएको जनगुनासो आएसँगै प्रहरीले निगरानी बढाउने क्रममा ट्याक्टरहरु पक्राउ पर्न थालेका हुन् ।
मंगलबार पक्राउ परेका ट्याक्टर जिल्ला समन्वय समितिको जिम्मा लगाइएकोमा समन्वय समितिले पहिलो पटकलाई भनेर ५ हजार रुपैंया जरिवाना गरी छाडेको थियो । बुधबार फेरि अर्को ट्याक्टर पक्राउ परेको र त्यसलाई पनि समन्वय समितिकै जिम्मा दिइएको एसपी मगरले बताए । उनका अनुसार नदीजन्य पदार्थको उत्खननमा रोक लगाउने या पक्राउ सवारी साधनमाथि कारबाही गर्ने अधिकार समन्वय समितिलाई भएकाले उसको जिम्मा लगाइएको हो ।
साल तमामीको अन्त्य तथा विकास निर्माणको मुख्य सिजनकै मौका पारेर राष्ट्रपति चुरे तराई मधेस कार्यक्रमको नाममा नदीजन्य पदार्थ उत्खनन र विक्री वितरणमा कानुनी बन्देज लगाउने गरिएका कारण कतिपय ठूला साना सरकारी योजनाहरु वर्षदिन ६ महिनासम्म अधुरो रहने गरेका छन् । ‘जेठ असार भनेको विकास निर्माण गर्ने पिक सिजन हो तर, यतिखेरैदेखि बालुवा, गिटी र ढुंगा निकाल्न रोक लगाइन्छ’ गाईघाटका उपभोक्ता दिलमाया राईले भनिन, ‘चुरे कार्यक्रमले विकास निर्माणसँगै व्यक्तिगत घर बनाउनेहरुलाई दिक्क बनाएको छ ।’
