उदयपुर । चैतको तेश्रो सातादेखि फुल्ने गुराँस माघ फागुनमा नै फुलेको देखेर लिम्चुङबुङ गाउँपालिका ५ जाँते मिनासिकाका टीकाप्रसाद काफ्ले छक्क परेका छन् । ६० वर्षीय काफ्लेले वरिपरि जंगलमा गुराँस फुलेको देखाउँदै भने,–‘जमाना फेरियो भन्थे, हो रहेछ, चैत दोश्रो सातामा फुल्ने गुराँस फागुन नलाग्दै फुल्यो, पोहोरसम्म गुराँस चैतमा फुलेको थियो ।
जिल्लाको नामेटार, जाँतेमा मात्र होईन उदयपुरको उच्च भु–भाग, रचने, जिरे, टाट्ने, द्धारेभन्ज्याङ, दारेगौडा, खलंगा, खर्क, भुङजुङ डाँडा, मरेडाँडा, लगाएत जंगलमा पनि गुराँस ढकमक्क फुलेको छ ।
जाँतेको लोखृमथुम्कादेखि द्धारेभन्ज्याङ सम्मको ५० किलोमिटर क्षेत्रका जंगलमा गुराँस राताम्मे फुलेको छ । गुराँसका कोपिला पनि प्रशस्त लागेका छन् । चैतको अन्तिम साता सम्ममा यस क्षेत्रका सबै गुराँस फुलिसक्ने अवस्थामा छन् ।
समुन्द्र सतहबाट २ हजार २ सय ५० मिटरको उचाइमा रहेको भुङजुङच डाँडा, चित्रे, लगायतका डाँडाहरुमा लालीगुराँस फुलेका कारण अत्यन्त रमणीय बनेको लिम्चुङबुङ गाउँपालिका ३ बाराहाका मान बहादुर बस्नेत बताउँछन् । यहीँबाट विश्वको सर्बोच्च शिखर सगरमाथा, कंन्चनजंघा, गणेश हिमाल, गौरापार्वती लगायत हिमश्रृङखलाको समेत दृश्यावलोकन गर्न सकिने उनले बताए । 
उनले जंगलमा फुलेका लालिगुराँस, नजिकै देखिने हिमश्रृङखला र सोहि ठाँउमा रहेको बैरागी गुफाले पर्यटकहरुको मन लोभ्याउने बताए । तर सो क्षेत्रमा यातायातको सुविधा पुगेपनि त्यहाँ रहेका प्राकृतिक सम्पदाको संरक्षण र प्रचार प्रसारकै कारण पर्यटक आवागमनमा समस्या भएको बताए ।
यस्तै कटारी नगरपालिका ११, १२ र १३ नम्बर वडाहरुमा पनि प्रसस्त मात्रामा गुराँस फुलि सकेका छन् । सिद्धिचरण राजमार्ग अन्तर्गतका स्कुले बालबालिकाहरुले गुराँसको फुल बेचेर कापी कलम किन्ने गरेको छन । कटारी नगरपालिका ११ का दानबहादुर मगरले भने–‘गुराँसका बोटमा कोपिला लागिसकेका छन्, पहिला पहिला फागुनमै गुराँस फुल्ने थिएन । 
यस क्षेत्रका किशोर किशोरीले जंगलमा फुलेको गुराँस टिपेर पुजा आजामा चलाउन थालेका छन् भने कोहि नयाँ पाहुना आए गुराँसकै माला लगाएर सम्मान गर्न थालेका छन् । गुराँस फुल्ने समय चैत महिना भए पनि फागुन पहिलो सातामै गुराँस फुल्नुलाई जलवायु परिवर्तनको असर भएको अनुमान गरिएको छ ।
उदयपुरका यस क्षेत्रमा सात प्रजातिका गुराँस छन् । जलवायु परिवर्तन र तापक्रमका कारणले चैत्रमा फुल्नु पर्ने गुराँस फूल एक महिना अगाडि नै फुलेको कृषि ज्ञान केन्द्र उदयपुरले जनाएको छ ।
