काठमाडौं । नेपाल कम्युनिष्ट पार्टी नेकपाका अध्यक्ष पुष्पकमल दाहाल प्रचण्डले बोलाएको सचिवालयको बैठक बस्न नसकेपछि धुम्बाराहीमा ५ नेताबीच छलफल भएको छ ।
कार्यकारी अध्यक्षको हैसियतमा अध्यक्ष पुष्पकमल दाहाल प्रचण्डले बोलाएको बैठकमा अर्का अध्यक्ष केपी शर्मा ओलीपक्षका नेताहरु अनुपस्थित भएपछि पाँच नेताहरुबीच थप छलफल भएको हो ।
बैठकमा अध्यक्ष प्रचण्ड, वरिष्ठ नेता माधव कुमार नेपाल, झलनाथ खनाल, वामदेव गौतम र नारायणकाजि श्रेष्ठ सहभागी छन् ।
सचिवालय अन्य सदस्यहरु ओलीसहित महासचिव विष्णु पौडेल र इश्वर पोखरेल अनुपस्थित रहेका छन् । कुनै पनि समुहमा खुलेर नलागेका अर्का सचिवालय सदस्य रामबहादुर थापा पनि बैठकमा अनुपस्थित छन् ।
धुम्बाराहीमा बैठक बस्नुअघि प्रचण्डले बालुवाटार पुगेर अध्यक्ष एवं प्रधानमन्त्री ओलीलाई भेटेका थिए ।
सचिवालयमा अल्पमतमा रहेका ओलीले बैठक बोलाउनका लागि सहमति दिन अस्वीकार गर्दै आएका छन् ।
