लहान । सामुदायिक वन क्षेत्रको जग्गा अतिक्रमणसँगै वरपरका वातावरण प्रदूषण बढाएको भन्दै स्थानीयवासीले बुधबार विहान १० बजेदेखि ११ बजेसम्म मारुती सिमेन्ट उद्योग विरुद्ध धर्ना बसेर प्रदर्शन गरेका हुन् । उद्योग विरुद्ध सयौंको संख्यामा प्लेकार्ड सहित मारुती सिमेन्ट उद्योगको विरुद्ध सडकमा प्रदर्शन गरेका छन् । मारुती सिमेन्ट उद्योगको प्रदूषणविरुद्ध गठित संघर्ष समितिको अगुवाइमा स्थानीयवासीले सो उद्योग विरुद्ध धर्ना र प्रदर्शन गरेका हुन् ।
प्रदर्शनकारीहरुले यसअघि सोमबार उद्योगमाथि कारबाहीको माग सहित मारुती उद्योगको बाहिर प्रदर्शन गरेका थिए ।
‘सार्वजनिक जग्गा फिर्ता गर, धुवाँधुलो बन्द गर, रोजगारीमा स्थानीयलाई प्राथमिकता दे’ लगायतका नारा लेखिएका प्लेकार्डसहित सयौँको संख्यामा ओर्लिएका प्रदर्शनकारीले उद्योगविरुद्ध चर्को नाराबाजी गरेका थिए । ती उद्योगले गोलबजार नगरपालिका र नरहा गाउँपालिकामा पर्ने झण्डै साढे चार बिघा वनको सार्वजनिक जग्गा अतिक्रमण गरेको स्थानीयवासीको आरोप छ ।

जग्गा अतिक्रमण मात्रै नभई सिमेन्ट उद्योगबाट निस्कने प्रदूषित धुवाँले आसपासका बस्ती पनि जोखिममा परेको स्थानीयवासी चिरञ्जीवी यादवले बताए । उद्योग परिसरस्थित शारदा डिष्टिलरीले घुर्मी खोलाबाट बगाउँदै आएको विषादीयुक्त पानीले पनि यहाँका सर्वसाधारणको स्वास्थ्यमा विभिन्न किसिमको समस्या देखिनुका साथै अन्नबालीमा पनि गम्भीर क्षति हुँदै आएको स्थानीयवासीको भनाइ छ ।
मारुती सिमेन्ट र शारदा डिष्टिलरीको मनोमानीका कारण गोलबजार नगरपालिका, मिर्चैया नगरपालिका र नरहा गाउँपालिकासहित घुर्मी नदीको छेउमा रहेका दर्जनौँ गाउँका लाखौँ जनता प्रत्यक्षरुपमा प्रभावित छन् । यहाँका स्थानीयवासीले जग्गा अतिक्रमण तथा प्रदूषण रोक्न निरन्तररुपमा आवाज उठाउँदै आएका छन् ।
समितिको बुधबार पुनः बस्ने बैठकले आन्दोलनको थप कार्यक्रम सार्वजनिक गरिने आन्दोलनरत चिरंजिवी यादवले जानकारी दिए । यता, मारुती सिमेन्ट पक्षसँग सम्पर्क हुन सकेनन् ।

तपाईको प्रतिक्रिया